Presidenti i Shteteve të Bashkuara, Donald Trump, ka kërkuar arritjen e një marrëveshjeje paqeje për t’i dhënë fund luftës në Ukrainë dhe “vrasjeve të pakuptimta”, pas sulmeve të fundit të Rusisë ndaj Kievit.
Një zyrtar amerikan, i cituar nga mediat, deklaroi se presidenti Trump dëshiron përfundimin e konfliktit dhe ndaljen e humbjeve të jetëve, në një kohë kur situata në terren është përshkallëzuar ndjeshëm.
Deklaratat vijnë pas një sulmi masiv rus me dronë dhe raketa gjatë natës në kryeqytetin ukrainas, ku humbën jetën të paktën 21 persona dhe u plagosën 85 të tjerë, përfshirë dy fëmijë. Autoritetet lokale e kanë cilësuar këtë si një nga goditjet më të rënda ndaj Kievit që nga fillimi i pushtimit në vitin 2022.
Sipas forcave ajrore të Ukrainës, Rusia lëshoi 496 dronë dhe 74 raketa të llojeve të ndryshme. Mbrojtja ajrore arriti të rrëzonte shumicën e tyre, por disa raketa dhe dronë goditën objektiva në Kiev.
Kryebashkiaku Vitali Klitschko e përshkroi sulmin si më të rëndin ndaj kryeqytetit ukrainas që nga nisja e luftës, ndërsa ekipet e kërkim-shpëtimit vijojnë punën mes rrënojave.
Gazetarët në terren raportuan shpërthime që zgjatën për orë të tëra, ndërsa alarmi ajror në qytet mbeti aktiv për më shumë se 11 orë.