Organizata Botërore e Shëndetësisë (OBSH) ka shpallur zyrtarisht fundin e shpërthimit të Hantavirusit, pasi nuk janë regjistruar raste të reja që nga 25 maji.
Lajmi u bë i ditur nga drejtori i përgjithshëm i OBSH-së, Tedros Adhanom Ghebreyesus, i cili njoftoi se personi i fundit i identifikuar si kontakt i një rasti të konfirmuar ka përfunduar periudhën e karantinës, ka rezultuar negativ në testim dhe është rikthyer në shtëpi.
Sipas të dhënave të OBSH-së, gjatë këtij shpërthimi u konfirmuan gjithsej 13 raste, ndërsa tre persona humbën jetën. Autoritetet shëndetësore gjurmuan dhe monitoruan mbi 650 kontakte në 33 vende, në kuadër të masave për frenimin e përhapjes së virusit.
Megjithatë, OBSH thekson se përfundimi i shpërthimit nuk nënkupton fundin e punës shkencore. Organizata do të vazhdojë bashkëpunimin me qeveritë dhe partnerët ndërkombëtarë për të studiuar më tej Hantavirusin, me synim përmirësimin e njohurive mbi sëmundjen dhe reagimin ndaj rasteve të ngjashme në të ardhmen.
Në të njëjtën kohë, OBSH po koordinon një studim ku marrin pjesë 21 shtete, i fokusuar në zhvillimin e metodave më të avancuara të diagnostikimit, trajtimeve dhe vaksinave.
Në përfundim të deklaratës së tij, Tedros Adhanom Ghebreyesus falënderoi Argjentinën, Kepin e Gjelbër, Kilin, Holandën, Afrikën e Jugut, Mbretërinë e Bashkuar dhe veçanërisht Spanjën për bashkëpunimin në menaxhimin e situatës dhe riatdhesimin e sigurt të pasagjerëve dhe ekuipazhit të anijes turistike MV Hondius.