Shtetet e Bashkuara dhe Irani pritet të vijojnë dialogun përmes një raundi të ri bisedimesh teknike në Doha të Katarit, me synimin për të çuar përpara zbatimin e marrëveshjeve të arritura dhe për të shmangur një përshkallëzim të mëtejshëm të tensioneve në rajon.
Sipas një burimi diplomatik të cituar nga CNN, ndërmjet palëve janë krijuar tashmë kanale komunikimi funksionale, ndërsa ekipet teknike do të vazhdojnë takimet gjatë ditëve në vijim për të diskutuar çështjet praktike që lidhen me marrëveshjet ekzistuese.
Burimi theksoi se ruajtja e dialogut konsiderohet thelbësore për të parandaluar incidente që mund të ndikojnë negativisht në stabilitetin rajonal.
Ndërkohë, presidenti amerikan Donald Trump konfirmoi përmes një postimi në rrjetet sociale se negociatorët amerikanë dhe iranianë do të zhvillojnë një takim të martën, duke sinjalizuar vazhdimin e procesit diplomatik mes dy vendeve.
Takimi në Doha shihet si një hap i rëndësishëm në përpjekjet për uljen e tensioneve mes Uashingtonit dhe Teheranit, megjithëse deri tani nuk janë bërë publike detaje mbi axhendën apo çështjet konkrete që do të diskutohen.