Numri i turistëve në Lezhë është rritur me 15% krahasuar me një vit më parë, duke reflektuar një sezon pozitiv për një nga destinacionet bregdetare më të vizituara në veri të vendit.
Kryeministri Edi Rama ndau të dhënat e publikuara nga kryetari i Bashkisë Lezhë, Pjerin Ndreu, duke theksuar se këto shifra nuk janë thjesht statistikë, por dëshmi e një rritjeje të vazhdueshme të turizmit në vend.
Sipas Ramës, zhvillimi i sektorit kërkon një fazë të re, ku kalimi drejt turizmit të resorteve me 5 yje shihet si një domosdoshmëri jo vetëm ekonomike, por edhe gjeostrategjike për Shqipërinë.
Të dhënat tregojnë se, përveç vizitorëve vendas dhe shqiptarëve nga Kosova, këtë vit është rritur ndjeshëm prania e turistëve të huaj në zonën e Shëngjinit dhe Lezhës, duke përbërë rreth 20% të totalit të vizitorëve.
Turistët ndërkombëtarë vijnë kryesisht nga Gjermania, Polonia, Italia, Çekia, Austria, Zvicra, Rumania, Ukraina, Bullgaria, Maqedonia e Veriut dhe Suedia. Grupi më i madh i turistëve të huaj janë gjermanët, të ndjekur nga polakët, italianët dhe çekët.
Këto të dhëna, sipas autoriteteve lokale dhe bizneseve turistike, konfirmojnë rritjen e interesit për Lezhën dhe Shëngjinin si destinacione gjithnjë e më të preferuara në tregun rajonal dhe evropian të turizmit.