Kryeministri Edi Rama ka ndarë detaje nga takimi i zhvilluar në Paris me Presidentin francez Emmanuel Macron, duke theksuar forcimin e mëtejshëm të marrëdhënieve mes Shqipërisë dhe Francës.
Përmes një reagimi publik, Rama bëri të ditur se një nga projektet e diskutuara me presidentin francez është edhe rilindja e Liceut Francez të Korçës, një institucion me rëndësi historike për lidhjet kulturore dhe arsimore mes dy vendeve.
Sipas kreut të qeverisë, projekti tashmë ndodhet në tryezën e Presidentit Macron dhe po ndiqet nën kujdesin e tij, pas vizitës së konsideruar historike që presidenti francez zhvilloi në Tiranë.
“Sot edhe Rilindja e Liceut Francez të Korçës është në tryezën e Presidentit të Francës, si një ndër projektet nën kujdesin e tij, pas vizitës historike në Tiranë”, u shpreh Rama.
Kryeministri vlerësoi gjithashtu nivelin e ri të bashkëpunimit mes dy vendeve, duke theksuar se Shqipëria tashmë konsiderohet partner strategjik i Francës në rajonin e Ballkanit.
Ai nënvizoi se një zhvillim i tillë do të ishte i vështirë të imagjinohej vetëm një dekadë më parë, duke e cilësuar si një dëshmi të transformimit të marrëdhënieve dypalëshe dhe të pozicionit ndërkombëtar të Shqipërisë.
“Një dekadë më parë, Franca që kujdeset për Shqipërinë dhe Shqipëria që konsiderohet partner strategjik i Francës në Ballkan, do të ishte e paimagjinueshme”, deklaroi Rama.
Takimi mes dy liderëve vjen në një moment kur marrëdhëniet mes Tiranës dhe Parisit kanë njohur një intensifikim të ndjeshëm në fushat e politikës, arsimit, kulturës dhe integrimit evropian.