Ministri i Mbrojtjes, Pirro Nufi, zhvilloi më 11-12 qershor një vizitë zyrtare në Pentagon, ku mori pjesë në Takimet Bilaterale për Konsultimet e Mbrojtjes mes Shqipërisë dhe Shteteve të Bashkuara të Amerikës.
Takimet u kryesuan nga Alton Buland, Zëvendësndihmës i Sekretarit amerikan të Mbrojtjes dhe përgjegjës për politikat evropiane dhe të NATO-s, ndërsa në fokus ishte forcimi i mëtejshëm i partneritetit strategjik mes dy vendeve në fushën e sigurisë dhe mbrojtjes.
Gjatë bisedimeve, palët diskutuan mbi zgjerimin e bashkëpunimit dypalësh dhe vijimin e përpjekjeve të përbashkëta për përballimin e sfidave të sigurisë në rajon dhe më gjerë.
Ministri Nufi theksoi se Shqipëria mbetet e përkushtuar ndaj aleancës me SHBA-në dhe rolit të saj në NATO.
“Ne jemi krenarë për angazhimin dhe kontributin në rritje të Shqipërisë në kuadër të këtij partneriteti strategjik dhe mezi presim të thellojmë më tej miqësinë dhe bashkëpunimin tonë”, u shpreh ai.
Më tej, Nufi vlerësoi mbështetjen afatgjatë amerikane ndaj Shqipërisë, duke theksuar se SHBA do të vazhdojnë të jenë partneri më i rëndësishëm strategjik i vendit.
“Shqipëria vlerëson thellësisht mbështetjen e vazhdueshme dhe afatgjatë të SHBA-ve. Është e qartë se SHBA do të mbeten partneri më strategjik i Shqipërisë dhe mbështetja juaj është thelbësore për ne në sektorin e sigurisë dhe mbrojtjes”, deklaroi ministri.