Një moment i papritur ka tërhequr vëmendjen gjatë transmetimit të “Top Arena”, ku Mateo Borri ishte i ftuar përballë Erjola Doçit.
Biseda nisi në një atmosferë të qetë, por mori një kthesë interesante kur Erjola vendosi të prekë një temë personale që lidhej me jetën sentimentale të Mateos. Situata u bë edhe më e veçantë për shkak të pranisë në studio të Brikenës, ish-partneres së tij, me të cilën nisi një histori dashurie gjatë qëndrimit në “Big Brother VIP Albania”.
Fillimisht ishte Mateo ai që e pyeti Erjolën për jetën e saj private, duke dashur të dinte nëse partneri aktual mund të ishte ai i duhuri për të ardhmen. Por influencerja nuk ngurroi t’ia kthente pyetjen me humor, duke lënë të kuptohej se kishte edhe ajo diçka për të thënë.
Kulmi i momentit erdhi kur Erjola e pyeti drejtpërdrejt: “Si është ta ndash skenën me ish-in?”, duke iu referuar Brikenës.
E papritur për Mateon, pyetja shkaktoi një reagim të menjëhershëm në studio. Ai zgjodhi të përgjigjej shkurt dhe me diplomaci: “Ashtu siç po e sheh edhe vetë”.
Shkëmbimi i batutave solli reagime mes të pranishmëve dhe ngjalli interes edhe te publiku, sidomos pas zërave dhe aludimeve të fundit për fundin e marrëdhënies mes Mateos dhe Brikenës.
Historia e tyre ka vijuar të komentohet nga fansat që prej përfundimit të “Big Brother VIP Albania”, ndërsa deklaratat e fundit lënë të kuptohet se dyshja po ecën tashmë në rrugë të ndara.