Partia Socialiste e Shqipërisë ka festuar sot 35-vjetorin e krijimit të saj në një aktivitet të zhvilluar në sheshin “Italia” në Tiranë, ku mori pjesë edhe kryeministri Edi Rama, njëherësh kryetar i Partisë Socialiste.
Në përfundim të aktivitetit, Rama publikoi në rrjetet sociale një video nga takimi, të shoqëruar me mesazhin: “Faleminderit, vetëm përpara”.
Më herët, në fjalimin e tij para mbështetësve, kryeministri u ndal te debatet e ditëve të fundit lidhur me investimet e propozuara në zonat e Zvërnecit dhe Sazanit, të cilat sipas tij synojnë zhvillimin turistik dhe ekonomik të vendit.
Ai theksoi se këto nisma kanë ngjallur diskutime publike, por duhet të vlerësohen mbi bazën e interesit afatgjatë të ekonomisë shqiptare.
Në këtë kontekst, Rama ftoi protestuesit që të njihen nga afër me faktet dhe dokumentacionin mbi projektet e propozuara, duke theksuar rëndësinë e transparencës dhe ballafaqimit të argumenteve.
“Ishulli nuk shitet dhe nuk jepet me qira, por mbetet pronë e shtetit shqiptar, ndërsa shteti synon të jetë partner në investime që sjellin zhvillim dhe përfitim publik”, u shpreh ai.
Kryeministri nënvizoi gjithashtu se Shqipëria duhet të vijojë me ritëm të qëndrueshëm në rrugën e zhvillimit ekonomik dhe procesin e integrimit europian.