Kampionati Botëror 2026 ka nisur zyrtarisht këtë të enjte me një ceremoni madhështore në stadiumin legjendar “Azteca” në Mexico City, përpara ndeshjes hapëse mes Meksikës dhe Afrikës së Jugut.
Spektakli i hapjes solli në skenë disa nga emrat më të njohur të muzikës botërore, ku vëmendjen kryesore e rrëmbeu performanca e këngëtares kolumbiane Shakira dhe artistit nigerian Burna Boy, të cilët interpretuan këngën zyrtare të turneut “Dai Dai”.
Dy artistët elektrizuan atmosferën para mijëra tifozëve të pranishëm, duke sjellë një performancë të mbushur me energji, koreografi dhe efekte vizuale. Kënga “Dai Dai” është shpallur himni zyrtar i Botërorit 2026 dhe mbështet Fondin Global të Edukimit të FIFA-s dhe Global Citizen.
Ceremonia u pasurua edhe me performanca nga artistë të tjerë të njohur ndërkombëtarë dhe latinoamerikanë, përfshirë J Balvin, Danny Ocean, Belinda, grupin meksikan Maná dhe Los Ángeles Azules. Hapja e spektaklit u shoqërua gjithashtu me një homazh për kulturën azteke dhe traditat e Meksikës.
Një tjetër moment i veçantë ishte interpretimi i himnit kombëtar të Meksikës nga këngëtari legjendar Alejandro Fernández, pak para fillimit të ndeshjes hapëse.
Botërori 2026 është edicioni i parë që organizohet nga tre vende pritëse – Meksika, Shtetet e Bashkuara dhe Kanadaja – duke shënuar nisjen e një muaji të mbushur me futboll, spektakël dhe emocione për miliona tifozë në mbarë botën.