Ministri për Evropën dhe Punët e Jashtme, Ferit Hoxha, ka deklaruar se protestat që po zhvillohen në Tiranë nuk ndikojnë në procesin e integrimit të Shqipërisë në Bashkimin Evropian.
Gjatë një bashkëbisedimi me gazetarë të BE-së, Hoxha u shpreh se tubimet janë dëshmi e funksionimit demokratik të vendit dhe e lirisë së shprehjes së qytetarëve.
“Protestat tregojnë që ne kemi liri, pra që njerëzit mund të dalin në rrugë e të kërkojnë çfarë duan. Nuk shoh lidhje mes protestave dhe negociatave me BE-në. Është e drejta e qytetarëve të protestojnë, ndërsa ne bëjmë punën tonë”, tha ministri.
Ai shtoi se protesta të ngjashme ndodhin edhe në vende të tjera dhe se ato janë pjesë e jetës demokratike, duke theksuar se në Shqipëri liria e protestës është rikthyer pas periudhës së komunizmit.
I pyetur nga gazetarët për investimin e paralajmëruar në zonën e Zvërnecit, me vlerë rreth 4 miliardë euro, Hoxha u shpreh se projekti është në zhvillim dhe se qeveria mbështet nisma që, sipas tij, respektojnë rregullat dhe standardet.
“Ne do ta bëjmë. Projekti do të realizohet nga arkitektë të njohur brenda dhe jashtë vendit. Qeveria do të sigurojë respektimin e rregullave, legjislacionit dhe zotimeve ndërkombëtare”, u shpreh ai.
Ministri theksoi gjithashtu se investimi është privat dhe se shteti luan rol mbikëqyrës për zbatimin e standardeve dhe ruajtjen e balancës mes zhvillimit dhe mbrojtjes së mjedisit.
Duke folur për procesin e integrimit, Hoxha deklaroi se Shqipëria po ecën me ritme të përshpejtuara dhe synon përmbylljen e negociatave në një afat sa më të afërt, duke theksuar angazhimin e qeverisë në këtë drejtim.