Një episod i shkurtër, por intensiv reshjesh ka shkaktuar probleme në qytetin e Bulqizës, ku vetëm 30 minuta shi kanë mjaftuar për të krijuar përmbytje dhe vështirësi në lëvizje.
Sasia e madhe e ujit ka ndikuar në qarkullimin e automjeteve në disa segmente rrugore, si në akset nacionale ashtu edhe në rrugët rurale. Ndërkohë, qytetarët janë përballur me vështirësi gjatë lëvizjes në rrugët e qytetit dhe në zonën e pedonales.
Pamjet nga terreni tregojnë se disa pjesë të pedonales janë mbuluar nga uji, ndërsa situata është rënduar edhe nga bllokimi i pusetave, të cilat nuk kanë mundur të përballojnë fluksin e madh të reshjeve.
Sipas raportimeve nga terreni, reshjet mund të kenë shkaktuar probleme edhe në sektorin e bujqësisë. Megjithatë, deri më tani nuk ka të dhëna zyrtare për dëme në kulturat bujqësore apo në sipërfaqet e mbjella.
Autoritetet vendore po ndjekin nga afër zhvillimet dhe po monitorojnë situatën në zonat më problematike. Deri në këto momente nuk raportohen dëme të konsiderueshme materiale apo incidente që të kenë rrezikuar jetën e qytetarëve.
Reshjet e dendura në mes të muajit qershor kanë sjellë një situatë të pazakontë për qytetin, duke nxjerrë në pah edhe problematikat e sistemit të kullimit dhe kanalizimeve në disa zona urbane.