Kryeministri Edi Rama ka reaguar sërish në rrjetet sociale lidhur me debatet dhe protestat e zhvilluara për projektet në zonat e Zvërnecit dhe Sazanit, duke mbajtur një qëndrim kritik ndaj organizatorëve dhe mënyrës së artikulimit të kundërshtimeve publike.
Në një postim të gjatë në Facebook, Rama ironizon protestat dhe figurat publike të përfshira në to, duke i cilësuar një pjesë të tyre si të orientuara nga rrjetet sociale dhe nga kërkimi i vëmendjes, ndërsa flet për “projekte imagjinare” dhe “rreziqe të sajuara” që sipas tij nuk përputhen me realitetin.
Ai thekson gjithashtu se debati publik shpesh shoqërohet me gjuhë të ashpër dhe ofendime, duke e konsideruar këtë një deformim të diskutimit mbi çështjet mjedisore dhe zhvillimore.
Në reagimin e tij, kryeministri mbron projektet në Zvërnec dhe Sazan, duke i cilësuar si iniciativa me rëndësi strategjike për ekonominë dhe turizmin, të cilat sipas tij do të kontribuojnë në zhvillimin e vendit dhe në krijimin e destinacioneve të reja turistike.
Rama thekson se këto projekte do të vijojnë pavarësisht kundërshtimeve, duke i paraqitur si pjesë të një vizioni më të gjerë për zhvillim ekonomik dhe integrim europian të Shqipërisë.
Postimi i plotë:
SHËNIM I DETYRUAR
Pra kur mblidheni ju me Rrethin Katror, e me blogerë e influencera që vijnë në bulevard për të marrë follouersa e llajke mbi tribunë, e me lloj-lloj qorrallapajsh rrotull dhe luftoni me tradhëtarë imagjinarë, kundër projektesh imagjinare, për të mbrojtur natyrën nga shkatërrimi imagjinar e për të shpëtuar flamingot nga vdekja imagjinare, kjo është “Shqipëria e Re”, “Shqipëria e Shqiptarëve”, “Shqipëria që nuk shitet”, ndërsa kur mblidhen të tjerët ju i jepni vetes të drejtën t’i shani, ofendoni, pështyni, siç bëni me të tërë ata që marrin kurajon të shprehin ndonjë
mendim ndryshe në faqet e tyre dhe duhet të marrin mbrapsht furinë e gjuhës më anti-ambientaliste të mundshme🤡
Këto bashkëngjitur janë vetëm disa prej mbetjeve të gojës suaj, në adresë të socialistëve të Elbasanit sot, të cilat po ia bashkëngjis këtij shënimi për të gjithë ata që kujtojnë gabimisht se ka mbetur më ambientalizëm në atë protestë të stisur me ndjenjat e shumëkujt, duke i siguruar të tërë njerëzit e mirë e të shqetësuar pa dallim, se projektet e Zvërnecit dhe Sazanit nuk do të ndalen kurrësesi, po do të bëhen shembëlltyra krenarie kombëtare, motorë të rinj të një ekonomie të denjë për një vend të Bashkimit Europian, pasqyra shembullore të zhvillimit të qëndrueshëm dhe destinacione që do t’i shohë me admirim mbarë bota🇦🇱🦩⭐️🇪🇺