Presidenti amerikan Donald Trump deklaroi se beson që udhëheqësi suprem i Iranit, Mojtaba Khamenei, është “më racional” se paraardhësi i tij, duke shtuar se ai ka pësuar lëndime serioze.
Në një intervistë për emisionin “Meet the Press” të NBC, e regjistruar të premten dhe publikuar këtë mëngjes, Trump u shpreh se lideri i ri iranian ka treguar qëndrueshmëri pavarësisht plagëve të marra.
“Më i ri, mendoj, më racional. Është plagosur mjaft rëndë, por ka treguar trimëri”, tha Trump.
Mojtaba Khamenei mori drejtimin e Iranit pas vdekjes së të atit, Ajatollah Ali Khamenei, i cili u vra në një sulm izraelit në ditën e parë të luftës. Që prej asaj kohe, lideri i ri nuk është shfaqur publikisht.
Trump theksoi gjithashtu se nuk ka plane për tërheqjen e trupave amerikane të angazhuara në konfliktin me Iranin.
I pyetur nëse di vendndodhjen e Mojtaba Khameneit, presidenti amerikan shmangu një përgjigje të drejtpërdrejtë.
“Nuk dua të them nëse e di apo jo se ku ndodhet, por ka një mundësi të madhe që ta di”, u shpreh Trump.