Kryeministri Edi Rama ka sjellë në vëmendje modelin e zhvillimit turistik të zonës së mbrojtur të Ria Formosa-s në jug të Portugalisë, duke e cilësuar atë si një shembull frymëzues për Shqipërinë dhe potencialin e saj në turizmin e qëndrueshëm.
Në një postim në rrjetet sociale, Rama theksoi se debati mbi zhvillimin në zonat e mbrojtura shpesh paraqitet si një përballje mes mbrojtjes së natyrës dhe zhvillimit ekonomik, ndërsa sipas tij, përvoja portugeze tregon se këto dy objektiva mund të bashkëjetojnë me sukses.
Sipas kryeministrit, Ria Formosa është një nga lagunat më të rëndësishme të Europës, e njohur për biodiversitetin e pasur, shpendët migratorë, ishujt ranorë dhe peizazhin unik natyror. Ai vuri në dukje se pikërisht në këtë zonë, Portugalia ndërtoi një model të suksesshëm ekonomik të bazuar te turizmi me vlerë të lartë.
Rama kujtoi se rajoni i Algarve-s ishte dikur një zonë me ekonomi të kufizuar, e mbështetur kryesisht te bujqësia dhe peshkimi. Megjithatë, përmes investimeve strategjike në turizmin cilësor dhe luksoz, zona u transformua në një nga destinacionet më prestigjioze të Europës.
“Destinacione si Quinta do Lago dhe Vale do Lobo u zhvilluan pranë një prej ekosistemeve më të rëndësishme të kontinentit, jo në dëm të natyrës, por falë saj”, theksoi ai.
Sipas Ramës, ky model ka sjellë miliarda euro investime private, mijëra vende pune, rritje të vlerës së pronave dhe të ardhura më të larta nga turizmi, ndërsa biodiversiteti dhe ekosistemi i zonës janë ruajtur.
Kryeministri nënvizoi se sfida nuk është të zgjidhet mes natyrës dhe zhvillimit, por të gjenden mënyrat për t’i bërë ato aleate të njëra-tjetrës.
Në përfundim, Rama shprehu bindjen se Shqipëria ka potencialin të ndjekë modele të ngjashme suksesi dhe të pozicionohet mes destinacioneve më të rëndësishme turistike në rajon dhe më gjerë.
“Pasuria krijohet kur natyra bëhet pjesë e zhvillimit dhe zhvillimi bëhet aleat i natyrës”, u shpreh ai, duke shtuar se Shqipëria synon të bëhet pjesë e elitës së turizmit ndërkombëtar.