Policia e Kolonjës ka arrestuar një 31-vjeçar, i cili akuzohet se ka dhunuar një shtetas duke i shkaktuar dëmtime të rënda fizike.
Sipas hetimeve paraprake, ngjarja ka ndodhur dy ditë më parë në fshatin Starje, ku i dyshuari ka goditur viktimën me grushte dhe shkelma në trup dhe në kokë, duke i shkaktuar plagë serioze.
Fillimisht, zbardhja e rrethanave të ngjarjes ka qenë e vështirë, pasi autori kishte pretenduar se e kishte gjetur të dëmtuarin të shtrirë. Megjithatë, veprimet hetimore dhe provat e mbledhura nga policia kanë dokumentuar se ai ishte personi që kishte ushtruar dhunën ndaj viktimës.
Për shkak të gjendjes së rënduar shëndetësore, i dëmtuari u transportua në Spitalin e Traumës, ku mori trajtim të specializuar mjekësor.
Sipas burimeve hetimore, konflikti dyshohet të ketë ndodhur për motive të dobëta, ndërsa policia ka sqaruar plotësisht rrethanat e ngjarjes.
Ndaj 31-vjeçarit janë ndërmarrë veprimet procedurale përkatëse, ndërsa grupi hetimor vijon punën për dokumentimin e plotë të rastit.