Një vatër zjarri është aktivizuar në zonën e fshatit Panaja në Vlorë, ndërsa era e fortë dhe temperaturat e larta po favorizojnë përhapjen e shpejtë të flakëve.
Zjarri po djeg sipërfaqe me bimësi dhe shkurre, ndërsa flakët janë përhapur drejt kodrave dhe zonave me ullishte, duke rrezikuar sipërfaqe të tjera të gjelbëruara.
Situata paraqitet e vështirë edhe për shkak të terrenit të thyer, i cili po pengon ndërhyrjen normale të forcave zjarrfikëse për shuarjen e flakëve me ujë.
Efektivët zjarrfikës po punojnë për izolimin e vatrës së zjarrit me mjete rrethanore, ndërsa era e fortë vijon të favorizojë avancimin e flakëve në zona të tjera.
Deri më tani nuk raportohen dëme në banesa apo persona të lënduar, ndërsa autoritetet mbeten në terren për të mbajtur situatën nën kontroll.