Një ngjarje e rëndë ka tronditur qytetin e Nantes në Francë, ku një 15-vjeçar humbi jetën pas një sulmi me armë zjarri, ndërsa dy të mitur të tjerë mbetën të plagosur. Autoritetet dyshojnë se ngjarja lidhet me përplasjet mes grupeve të trafikut të drogës.
Sipas autoriteteve franceze, të shtënat ndodhën të enjten në mbrëmje, rreth orës 19:30, në një pallat apartamentesh. Sulmuesit, të cilët lëviznin me motoçikletë, hapën zjarr ndaj tre adoleshentëve dhe më pas u larguan me shpejtësi nga vendi i ngjarjes.
Prokurori i Nantes bëri të ditur se njëri prej të rinjve, i cili sapo kishte mbushur 15 vjeç, ndërroi jetë në hyrje të ndërtesës. Një tjetër adoleshent, vetëm 13 vjeç, ndodhet në gjendje kritike në spital, ndërsa një 14-vjeçar ka mbetur i plagosur, por është jashtë rrezikut për jetën.
Sipas hetimeve paraprake, autorët kanë ndjekur një nga djemtë deri në katin e 13-të të pallatit, ku ai ishte strehuar në një apartament, çka tregon brutalitetin dhe vendosmërinë e sulmit.
Policia franceze po heton pistën e një larjeje hesapesh mes grupeve kriminale të lidhura me trafikun e drogës, ndërsa ngjarja ka rikthyer shqetësimet mbi përfshirjen e të miturve në dhunën e lidhur me krimin e organizuar në vend.