Detaje të reja kanë dalë nga ngjarja e rëndë e ndodhur në Bushat të Shkodrës, ku pas një shkëmbim zjarri me armë, fatmirësisht nuk ka pasur viktima, por 3 persona janë shpallur në kërkim, mes të cilëve dhe dy vëllezërit Prendi nga Bushati.
Sipas burimeve të policisë kriminale në Shkodër, automjeti tip “Audi” me targa gjermane ka të dhëna se është përdorur për një kohë nga Eljo Hato, person ky i shpallur në kërkim nga SPAK-u.
Të dhënat policore tregojnë se mjeti për një kohë të gjatë është përdorur rregullisht nga Eljo Hato, policia e Shkodrës, ka ngritur dyshime të forta se brenda në “Audi”-n e blinduar, ka qenë dhe Eljo Hato, mik i ngushtë i Ervis Martinajt.
Hato i ka shpëtuar tre herë aksioneve të policisë dhe RENEA-s, ku herën e fundit forcat speciale i shkuan në shtëpi dhe i vranë dy qentë e banesës së tij.
Tashmë kërkimet për Haton vijojnë ende por të gjitha aksionet nuk kanë sjellë ndonjë rezultat për lokalizmin e saktë dhe arrestimin e tij.
Besohet se njëri nga vëllezërit Prendi ka qëlluar me automatik, duke lëvizur me një motor.
Ndërsa dy persona të tjerë kanë lëvizur me një automjet “BMW”, e cila më pas është gjendur nga policia i braktisur.
Kjo makinë ka pasur dëmtime nga plumbat, duke krijuar përshtypjen e fortë se në venndgjarje ka pasur shkëmbim zjarri.
Ndërkohë, në vendin e ngjarjes janë gjetur disa gëzhoja të përdorura nga disa armë të ndryshme.