Një tentativë për vjedhje automjeti është parandaluar nga Policia në Dhërmi, ku në pranga kanë rënë dy persona, një 25-vjeçar dhe një e mitur 17-vjeçare.
Sipas njoftimit zyrtar, shërbimet e Policisë reaguan menjëherë pas sinjalizimit për vjedhjen e një automjeti tip “Land Rover”, duke bërë të mundur lokalizimin dhe ndalimin e tij.
Gjatë ndërhyrjes, drejtuesja e mjetit nuk iu bind urdhrit të Policisë dhe, në përpjekje për t’u larguar, shkaktoi dëmtime në automjetin e vjedhur.
Në përfundim të veprimeve, u arrestua shtetasi N. Xh., 25 vjeç, banues në Durrës, i akuzuar për “Vjedhje të mbetur në tentativë” në bashkëpunim, “Mosbindje ndaj urdhrit të Policisë” dhe “Largim nga vendi i aksidentit”. Ndërkohë, 17-vjeçarja u arrestua për “Vjedhje të mbetur në tentativë”, “Drejtim mjeti në mënyrë të parregullt”, “Shkatërrim prone” dhe “Mosbindje ndaj urdhrit të Policisë”.
Nga hetimet paraprake rezulton se dy të rinjtë kishin shkuar në Dhërmi me një automjet tip “Benz”, fillimisht me qëllim blerjen e mjetit. Por duke përfituar nga mungesa e pronarit, 17-vjeçarja kishte ndezur “Land Rover”-in dhe ishte larguar pa leje.
Më pas, ajo ka bashkëpunuar me 25-vjeçarin, i cili u kap në zonën e Kushtrimi, ndërsa automjeti me të cilin kishin udhëtuar drejt Dhërmiut u përplas në Palasë dhe u braktis.
Policia sekuestroi në cilësinë e provës materiale të dy automjetet, ndërsa materialet procedurale i janë referuar Prokurorisë për veprime të mëtejshme.