Në deklaratën e tij në Athinë, Kryeministri Edi Rama theksoi se synimi i Shqipërisë dhe Greqisë është që brenda këtij viti të arrihet marrëveshje për të gjitha çështjet e hapura mes dy vendeve, me ambicien që në vjeshtën e ardhshme të deklarohet një dakordësi e plotë.
Duke folur në një bisedë në kuadër të Forumi Ekonomik i Delfit me kryeredaktorin e gazetës Kathimerini, Alexis Papahelas, Rama tha se marrëdhëniet me kryeministrin grek Kyriakos Mitsotakis kanë qenë të hapura dhe të bazuara në respekt të ndërsjellë.
Ai përmendi si një moment që krijoi tension çështjen “Beleri”, por theksoi se kjo nuk duhet të pengojë zgjidhjen e problemeve më të gjera mes dy vendeve. Sipas Ramës, të dyja palët kanë vendosur të mos lejojnë që mosmarrëveshje të veçanta të dëmtojnë marrëdhënien dypalëshe.
Një tjetër pikë që ai ngriti ishte edhe “ligji i luftës” me Greqinë, të cilin Shqipëria kërkon ta mbyllë përfundimisht. Rama theksoi gjithashtu rëndësinë e pakicës greke në Shqipëri dhe komunitetit shqiptar në Greqi si “asete” të rëndësishme për marrëdhëniet mes dy vendeve.
“Nga ana jonë nuk ka asnjë problem për këtë çështje, kemi çështjen ende të pazgjidhur të ligjit të luftës, duam të mos jetë dhe nuk kemi probleme të tjera. Kemi diçka që është një aset i madh për ne që është pakica greke dhe diçka tjetër që është aset i madh për ju që janë qytetarët shqiptarë që jetojnë këtu, të cilët janë shumë dhe plotësisht të integruar. U detyrohemi të dyja palëve që të kemi një raport miqësor”, nënvizoi Rama.
Në lidhje me çështjen Beleri, ai tha se nuk sheh arsye për rikthim tek ajo temë, duke shtuar se gjyqësori në Shqipëri është i pavarur dhe po kalon një reformë të thellë, edhe pse pranoi problemet me paraburgimet dhe zgjatjen e proceseve gjyqësore.
Në thelb, mesazhi i Ramës ishte se Tirana dhe Athina po synojnë një “mbyllje të paketës” së çështjeve të hapura dhe një marrëdhënie më të stabilizuar strategjike mes tyre.