SHKODËR– Gjykata e Shkallës së Parë në Shkodër ka lënë me masën e sigurisë “arrest me burg” shtetasit Zyber Zagradi, kamarieri i plagosur dhe Mario Pali, të dyshuar si bashkëpunëtor të autorëve të dyshuar të vrasjes së dyfishtë në Velipojë.
Të martën e 19 Gushtit, në orën 21:00 të mbrëmjes në vijim të një konflikti për motive të dobëta, i cili daton dy muaj më parë, përfundoi në të shtëna me armë zjarri duke lënë të vdekur dy persona. Viktima mbetën Arsid Hoxha, 22 vjeç edhe Ersild Ishmi, 33 vjeç. Nga ana tjetër autorët e dyshuar të këtij krimi janë dy vëllezërit Eduard dhe Gëzim Frroku, pronarë të një hoteli. Aktualisht ata janë të arratisur dhe të shpallur në kërkim nga policia. Drejtori i policisë së Shkodrës Edmond Sulaj deklaroi në një dalje për mediat se shkak për ngjarjen dyshohet se u bë një debat i ndodhur në fund të muajit Qershor në hotelin e vëllezërve Frroku, mes kamarierit dhe kuzhinierit, Zyber Zagradi dhe Mario Pali.