TIRANË– Anëtari i Kryesisë së PD-SË, Belind Këlliçi, teksa ka folur para Bashkisë së Tiranës është shprehur se po thuhen të vërtetat e mëdha. Më tej ai ka thënë se po bëhet çfarë është e mundur që të shuhet kjo protestë, por nuk po ia arrijnë dot. E në kuadër të kësaj, ai përmendi emrin e Elton Kacidhes, një prej zyrtarëve të Bashkisë së Tiranës.
“Në këtë vend nuk ka drejtësi, edhe pse ka pasur një besim të qytetarëve kur u ngrit SPAK, çfarë kanë parë këto ditë? Një institucion plotësisht të kapur nga Edi Rama dhe Erion Veliaj. Erion Veliaj javën e kaluar shëtiste me jahtin 7 mln euro të Armando Lilos. Nëse sheh gomonen që shëtis unë që e marr për 20 euro, po jahtin e Armando Lilos 7 mln euro e ke parë? Armando Lilo është ai që mburret se i ka mbyllur punët Veliajt me prokurorët që ka çështjet të hapura. PAK, që ne prisnim të bënte drejtësinë në këtë vend, nuk i përmend as emrin Erion Veliajt. Në këtë godinë strehohet një bandë, një grup i strukturuar kriminal”, tha Këlliçi.
Gjithashtu Këlliçi tha se: Kryetari i Bashkisë sheh kur unë shëtis me një gomone, që sheh atë tendën e Adriana Kalasë, si ka mundësi që nuk sheh ato 7 katet pa leje përballë zyrës së tij.
Në vijim, Këlliçi u shpreh kritik ndaj ndërkombëtarëve, që sipas tij, nuk flasin për skandalet e Bashkisë së Tiranës.
“Unë jam një djalë që jam rritur në këtë qytet, që jam shkolluar në perëndim, por ca të vërteta duhen thënë, sepse për këto skandalet dhe vjedhjet , për heshtjen e SPAK dhe prokurorëve të tij, nuk flasin as ndërkombëtarët.
Në Tiranë duhej të kishim një situatë krejt tjetër, kësaj godine duhej t’i ishte vënë dryni, sepse strehon grupin kriminal, ata që vjedhin taksat dhe buxhetin e shqiptarëve”, tha Këlliçi.
Në vijim ai u shpreh se në shtator dhe tetor do të rriten temperaturat, pasi do të vijojnë protestat edhe më të mëdha se sa protestat e deritanishme.
“Lajmi i fundit është që edhe fusha Ali Demi nuk do të ekzistojë më, pasi Erion Veliaj ka vendosur të firmosë lejen e rradhës së ndërtimit, monstrën e rradhës, kështu më shkruajnë dy qytetarë, që janë njoftuar se për këtë zonë, nuk do të ketë më hapësirë publike.” -tha Këlliçi.