Gazetari Adriatik Doci ka reaguar me një postim të fortë në rrjetet sociale, ku hedh akuza ndaj ish-ministres dhe deputetes së Partia Socialiste e Shqipërisë, Elisa Spiropali.
Në reagimin e tij, Doci shkruan se “hijet e Spiropalit nga pronat dhe paratë publike tek pasuritë e paluajtshme” shtrihen në disa drejtime, duke përmendur sipas tij lidhje me prona publike në Fier, përdorimin e fondeve publike, si edhe përfshirje të familjarëve në aktivitete biznesi.
Sipas gazetarit, një sërë kompanish që lidhen me rrethin familjar të Spiropalit kanë operuar ndër vite, duke përmendur konkretisht kompani si Solomon Group, Solomon Construction, Blest Taxi, Fortes Construction, BIOFOOD’S dhe SALT.
Në postimin e tij, Doci thekson se sipas tij nuk bëhet fjalë vetëm për përfitime me sfond konflikti interesi, por për atë që ai e cilëson si “hije të theksuara korrupsioni”, duke pretenduar gjithashtu se aktivitetet janë zhvilluar si gjatë kohës para marrjes së posteve publike nga Spiropali, ashtu edhe pas emërimit të saj në funksione shtetërore.
“Hijet e Spiropalit nga pronat dhe paratë publike tek pasuritë e paluajtshme
Nga do që t’a drejtojë fytyrën, hijet e zonjës Elisa Spiropali zgjaten sa tek pronat publike në Fier, paratë publike, licencat, tenderat brenda rrethit deri tek shit-blerja e pasurive të paluajtshme përmes vëllait, bashkëshorit, kunatës, vjehrrit, prestanomeve të bashkëshortit etj. Një kartel kompanish mbuluar me hije familjare janë krijuar, kanë xhiruar dhe ndarë para gjatë dhe pas ngjitjes së Elisës në poste publike. Solomon Group, Solomon Construction, Blest Taxi, Fortes Construction, BIOFOOD’S, SALT etj., janë vetëm disa nga hijet e zonjës Spiropali. Nuk janë thjeshtë përfitime me sfond konflikti interesash, por me hije të theksuara korrupsioni. Herë nën hijen e Skënderbeut dhe herë të Mamicës, zonja Spiropali rezulton se e ka ‘mjelë’ PS-në po aq sa disa shokë të saj partie, sot në burg apo në arrati”, shkruan Doçi.