Irani ka ndërmarrë një kundërpërgjigje pas sulmeve të raportuara nga Shtetet e Bashkuara të Amerikës dhe Izrael, duke goditur me raketa qendrën e shërbimit të Flotës së 5-të të Marinës Amerikane në Bahrein.
Qendra Kombëtare e Komunikimit e Bahreinit njoftoi se objekti ka qenë shënjestër e një “sulmi me raketa”, sipas një deklarate të cituar nga Agjencia Shtetërore e Lajmeve e Bahreinit (BNA). Në deklaratë theksohet se “detaje të mëtejshme do të ofrohen në kohën e duhur”, pa u bërë publik autorësia e sulmit.
Bahreini është selia e Flotës së 5-të të Marinës Amerikane, e cila mbulon operacionet në Gjirin Persik, Detin e Kuq, Detin Arabik dhe pjesë të Oqeanit Indian, duke përfaqësuar një nga bazat më strategjike të pranisë ushtarake amerikane në rajon.
Deri tani nuk ka pasur reagim të menjëhershëm nga ushtria amerikane. Megjithatë, ambasada e SHBA-së në Bahrein kishte paralajmëruar më herët qytetarët amerikanë që të strehoheshin, për shkak të kërcënimeve të mundshme nga raketa dhe dronë mbi territorin e vendit.