Presidenti ukrainas Volodymyr Zelensky ka deklaruar se Shtetet e Bashkuara të Amerikës po propozojnë që Rusia dhe Ukraina t’i japin fund luftës gati katërvjeçare deri në fillim të kësaj vere.
“Amerikanët po propozojnë që palët ta përfundojnë luftën deri në fillim të kësaj vere dhe me gjasë do të ushtrojnë presion ndaj palëve sipas këtij afati”, u shpreh Zelensky për gazetarët.
Sipas mediave ukrainase, presidenti ukrainas tha se Kievi e kupton se ky afat lidhet edhe me zhvillimet e brendshme politike në SHBA, duke shtuar se beson se ai përkon me nisjen e fushatës zgjedhore për zgjedhjet e ndërmjetme amerikane që pritet të mbahen më vonë gjatë këtij viti.
Zelensky bëri të ditur gjithashtu se SHBA-ja ka propozuar organizimin e një takimi të parë mes ekipeve negociuese të Rusisë dhe Ukrainës, i cili mund të zhvillohet “ndoshta në Miami, brenda një jave”.
Po ashtu, sipas tij, Uashingtoni ka sugjeruar që të dyja palët të rikthejnë mbështetjen për nismën e presidentit amerikan Donald Trump për ndalimin e sulmeve ndaj infrastrukturës energjetike. Zelensky theksoi se Ukraina e ka konfirmuar mbështetjen për këtë nismë, ndërsa Rusia ende nuk ka dhënë përgjigje.
Këto deklarata vijnë pas negociatave dyditore mes përfaqësuesve të Moskës, Kievit dhe Uashingtonit, të mbajtura më 4 dhe 5 shkurt në Abu Dabi të Emirateve të Bashkuara Arabe. Pas këtyre bisedimeve, Rusia dhe Ukraina realizuan shkëmbimin e parë të të burgosurve pas pesë muajsh.
Më herët, më 23 dhe 24 janar, ishte zhvilluar edhe një raund fillestar i bisedimeve trepalëshe, gjithashtu në Abu Dabi.