Tre punonjës të Policisë së Orikumit, mes tyre edhe shefi i stacionit, janë vënë në arrest shtëpie pas dyshimeve për korrupsion dhe shpërdorim detyre.
Agjencia e Mbikëqyrjes Policore (AMP), përmes Drejtorisë së Hetimit dhe Drejtorisë Rajonale Vlorë–Gjirokastër, ka ekzekutuar vendimin e Gjykatës së Posaçme të Shkallës së Parë për Korrupsionin dhe Krimin e Organizuar, e cila ka caktuar masën e sigurimit personal “arrest në shtëpi”, parashikuar nga neni 237 i Kodit të Procedurës Penale, ndaj efektivëve:
D. L., Inspektor krimesh pranë Stacionit të Policisë Orikum
A. J., Shef i Stacionit të Policisë Orikum
A. F., Specialist i Policimit në Zonë pranë Stacionit të Policisë Orikum
Sipas AMP-së, tre punonjësit e policisë dyshohen për kryerjen e veprave penale “Korrupsion pasiv i personave që ushtrojnë funksione publike”, në bashkëpunim, dhe “Shpërdorim i detyrës”, të parashikuara nga nenet 259, 248 dhe 25 të Kodit Penal.
Hetimet e drejtuara nga SPAK kanë zbuluar se, në shtator të vitit të kaluar, efektivët, në kundërshtim me ligjin dhe duke keqpërdorur funksionin e tyre, kanë kërkuar dhe marrë nga një shtetas shumën prej 270 mijë lekësh, në këmbim të shmangies nga përgjegjësia penale.
Hetimi është zhvilluar për disa muaj me metoda speciale, duke mundësuar dokumentimin e plotë të veprimeve korruptive me prova ligjore, çka çoi në marrjen e masave të sigurimit personal nga GJKKO.
Agjencia e Mbikëqyrjes Policore bën me dije se hetimet vijojnë për zbardhjen e plotë të rrethanave të ngjarjes, ndërsa rithekson angazhimin e saj për garantimin e zbatimit të ligjit dhe luftën kundër çdo forme abuzimi nga punonjësit e strukturave të sigurisë.
AMP u bën thirrje qytetarëve të denoncojnë çdo rast shkeljeje apo abuzimi.