TIRANË– Koreografi i njohur Kledi Kadiu teksa ka qenë i ftuar në “Mirëmbrëma Yje” nga Arbana Osmani ka folur me shumë ndjenjë dhe dhimbje për një nga periudhat më të vështira të jetës së tij, duke rrëfyer se si një ngjarje që zakonisht shoqërohet me festë dhe gëzim për çdo familje, për ta u kthye në një plagë të thellë shpirtërore.
“U ndryshua gjithçka. Festa që çdo familje bën kur lind një fëmijë, për ne u shndërrua në një dhimbje të madhe. Fakti që ai ishte kaq i vogël… mospranimi i një prindi, pyetja e vazhdueshme ‘pse atij dhe jo mua’ ishte diçka që të shkatërron.”-tha koreografi.
Ndër të tjera ai tregoi se ishte një periudhë e mbushur me ankth, lot dhe pafuqinë për të ndalur një realitet të hidhur, por edhe me forcën për të ecur përpara.
“Ishte diçka që nuk e ndalon dot. Ajo kohë kaloi, dhe fatmirësisht gjithçka shkoi mirë për Gabrielin.”- tha ai, duke theksuar se sot familja jeton me shpresë dhe besim.
Në rrëfimin e tij, Kledi ndau edhe detaje mbi gjendjen shëndetësore të djalit: Ai sot shkon në kopsht, normalisht ka mungesat që ka çdo fëmijë me vështirësi, por shpresa është e lartë. Ishte një virus që mori një drejtim të rëndë… merret në momentin që dëmton pjesë të caktuara të trurit. I ka dëmtuar të folurit dhe lëvizjen, nuk ecën dot./Radar.al