Trajneri Arbeloa dha një konferencë që jo pak tifozë i ka çuditur. Tekniku i Real Madrid foli pas humbjes turpëruese 3 me 2 ndaj Albasetes, që i eliminoi nga Kupa e Mbretit. Nuk kishte pak përgjegjësi, pasi preferoi rotacionin për pjesën më të madhe të skuadrës. “Nuk kam frikë nga dështimi. I kuptoj ata që duan ta përshkruajnë këtë humbje si të tillë. Dështimi është pjesë e rrugës drejt suksesit. Për mua, ato nuk janë drejtime të kundërta. Kjo do të më bëjë më të mirë. Kemi shumë hapësirë për përmirësim, por nuk kam frikë nga dështimi. Kam dështuar shumë herë në jetën time. Kam pësuar eliminime më të këqija në kupë se kjo, dhe mezi pres të kthehem nesër në Valdebebas për të punuar me lojtarët e mi”, e nisi Arbeloa fjalën.
Arbeloa për rezultatin
“Në këtë klub, edhe një barazim është i keq, është një tragjedi, ndaj imagjinoni një humbje si kjo. Sidomos kur humbet ndaj një kundërshtari të renditur më poshtë. Nëse dikush është përgjegjës, jam unë, sepse jam unë ai që mora vendimet për formacionin, mënyrën se si donim të luanim dhe zëvendësimet. Mund vetëm t’i falënderoj lojtarët për pritjen që më kanë bërë dhe për punën për t’i rikthyer ata në formë fizike dhe mendore”.
Arbeloa për fajtorin
“Isha i bindur se përzgjedhja e skuadrës ishte e duhura, ekipi që hodha në fushë dhe stoli ishin një ekip i shkëlqyer. Kam një skuadër shumë të talentuar dhe nuk është e lehtë për ta të bëjnë gjithçka që u kam kërkuar në ditën e tyre të parë me një trajner të ri, dhe ndihem plotësisht përgjegjës. Gjëja e rëndësishme është të fillojmë punën dhe t’i rikthejmë në rrugën e duhur. Kemi shumë lojtarë që duhet të kthehen në gjendjen e tyre maksimale fizike dhe duhet të punojmë fort dhe të përgatitemi për ndeshjen e së shtunës”.
Arbeloa për Vinicius
“Për mua, ka qenë pozitive që pas gjithçkaje nga vinte, pas përpjekjeve që bëri javën e kaluar, ai donte të ishte këtu dhe të luante çdo minutë, gatishmëria e tij për të luajtur dhe për të ndihmuar ekipin, për të shtyrë përpara dhe për të mos u fshehur, ky është Vini që dua të shoh. Disa ditë do të jenë më të ndritshme se të tjerat, por ky është Vini që dua të shoh, kapiteni. Së shpejti ai do të na dhurojë disa net të shkëlqyera dhe, nëse Madridi dëshiron të fitojë tituj, ata kanë nevojë për të në formën e tij më të mirë”.
Arbeloa për pushimin e lojtarëve kyç
“Nuk pendohem, do të bëja të njëjtën gjë sërish. Kam sjellë një ekip të aftë për të mposhtur Albaseten dhe çdo ekip tjetër. Kam një skuadër të jashtëzakonshme, është një privilegj t’i stërvitësh ata, do ta bëja këtë thirrje sërish dhe sërish”.
Arbeloa për gjendjen fizike dhe intensitetin e kalendarit
“Humbja nuk është kurrë një lehtësim. Nuk ishte qëllimi ynë të humbnim këtu sot. Kemi shumë hapësirë për përmirësim fizik. Për këtë është Antonio këtu, për të na dhënë një avantazh shtesë. Na duhet”.
Arbeloa nëse lojtarët janë fajtorë
“Kam parë lojtarë që donin të fitonin. Nuk mund t’i fajësoj për asgjë. Mënyra se si më pritën dje, qëndrimi që kanë pasur. Të gjithë e dimë sa kërkuese është kjo stemë. Jemi të gjithë madridista, të gjithë shkojmë në shtrat duke u ndier të lënduar. Nesër duhet të ngrihemi dhe t’i kthehemi punës”.
“E thashë edhe dje. Çdo lojtar i Madridit është shumë kërkues me veten, shumë. Kërkesat janë të larta. Ata ishin të parët që donin të merrnin pjesën e tyre të përgjegjësisë. Nesër në orën 11:00 do të jemi në Valdebebas. Ky klub është shumë kërkues, por ekipet e mëdha tregohen në këto momente. Ne e dimë se si e duam dhe çfarë do të bëjmë. E dimë që koha nuk është në anën tonë”.
Arbeloa për ndikimin që mund të ketë kjo humbje
“Kam humbur shumë herë. Për mua, ajo që ka rëndësi është vitrina e trofeve, titujt. Nuk jam këtu për të zbukuruar CV-në time. As për t’u konsideruar një trajner më i mirë apo më i keq”.
Arbeloa për shpjegimin e rezultatit Florentinos
“Ai nuk ka nevojë për shpjegim, ai di më shumë për të gjitha këto sesa unë. Ai e njeh historinë e këtij klubi. Ne jemi një klub fitues. Kemi pasur humbje të dhimbshme dhe këtu shohim vetëm përpara”.
Arbeloa për kërkesat e shumta në pak kohë
“Shumë, sepse kur vjen një trajner i ri, ai ka ide të reja. Jam i sigurt që kam kërkuar gjëra të ndryshme. Duhet të kuptohet konteksti. Ajo që ndodh në fushë është përgjegjësi e trajnerit. Kur ekipi luan keq, është sepse unë nuk kam qenë në gjendje të bëj më mirë”.
Arbeloa për gjënë më urgjente për t’u përmirësuar duke filluar nga sot
“Do të përballemi me shumë ndeshje kundër ekipeve që do të mbrohen në gjysmën e tyre. Duhet të kemi ide më të qarta. Më shumë sesa në një ditë që nuk ishte e lehtë. Dhe duhet të rikuperojmë nga të gjitha dëmtimet që ka pasur ekipi. Duhet ta rikthejmë atë kënaqësi”./PanoramaSport