Pajisjet mjekësore të sekuestruara në spitalin privat “International Medicare”, i cili është nën hetim nga Prokuroria e Tiranës për evazion fiskal, do të vihen në shërbim të sistemit shëndetësor publik.
Me miratimin e prokurores së çështjes, Risena Xhaja, Agjencia e Administrimit të Pasurive të Sekuestruara dhe të Konfiskuara ka vendosur t’i kalojë këto pajisje Ministrisë së Shëndetësisë. Ato do të përdoren nga Qendra Spitalore Universitare “Nënë Tereza” (QSUT) si dhe nga spitalet rajonale publike, në bazë të nevojave konkrete.
Spitali privat ndodhet në hetim pasi autoritetet kanë konstatuar një sërë shkeljesh të rënda, përfshirë kryerjen e ndërhyrjeve kirurgjikale pa fatura tatimore, përdorimin e medikamenteve të skaduara, punësimin e mjekëve të huaj pa licencë, si dhe punonjës të pasiguruar. Sipas hetimeve, këto shkelje i kanë shkaktuar shtetit një dëm financiar rreth 400 mijë euro.