Një ngjarje e rëndë familjare ka tronditur këtë të diel Orikumin, në qytetin e Vlorës, ku një grua ka humbur jetën si pasojë e dhunës së ushtruar nga bashkëshorti i saj, i cili më pas dyshohet se ka kryer vetëvrasje.
Sipas informacioneve paraprake, viktima, Sose Xhebroj, 40 vjeçe, është gjetur pa shenja jete në banesën e saj, me shenja të dukshme dhune. Ajo ishte dërguar fillimisht në spital në gjendje të rëndë shëndetësore, por nuk ka mundur t’u mbijetojë plagëve të marra.
Ndërkohë, bashkëshorti i saj, Llogora Xhebroj, 50 vjeç, është gjetur i pajetë në garazhin e banesës. Sipas dyshimeve paraprake, ai i ka dhënë fund jetës duke përdorur një armë zjarri pistoletë, e cila është sekuestruar nga Policia në cilësinë e provës materiale.
Shërbimet e Policisë ndodhen në vendngjarje dhe, nën drejtimin e Prokurorisë, grupi hetimor po vijon punën për dokumentimin e plotë dhe zbardhjen e rrethanave të kësaj ngjarjeje të rëndë.
Njoftimi zyrtar i Policisë:
“Sot, rreth orës 13:30, është marrë njoftim nga urgjenca mjekësore se një shtetase, në Orikum, është gjetur pa shenja jete dhe me shenja dhune në banesë. Nga veprimet e para hetimore dyshohet se shtetasja S. Xh., 40 vjeçe, është vrarë nga bashkëshorti i saj, shtetasi Ll. Xh., 50 vjeç.
Pas kontrolleve të ushtruara nga shërbimet e Policisë në zonën përreth kësaj banese, në garazh është gjetur i pajetë, i dyshuar i vetëvrarë me armë zjarri, autori i kësaj ngjarjeje. Arma pistoletë u sekuestrua në cilësinë e provës materiale.
Grupi hetimor, nën drejtimin e Prokurorisë, vijon punën për dokumentimin e plotë të rrethanave të kësaj ngjarjeje.”