Organizata kriminale e vrasësve me pagesë, e përbërë nga shtetas shqiptarë dhe grekë, kishte shtrirë aktivitetin e saj në shumë zona dhe po përgatitej për një atentat në Pire, kundër një biznesmeni që kontrollon klube nate dhe stacione benzine.
Hetuesit zbuluan se lideri kryesor i grupit ishte Dhimitër Meçi, i njohur si “Dimos” nga Gjirokastra, së bashku me një bashkëpunëtor grek 48-vjeçar që luante rol organizativ në veprimtari. Sulmet e tyre të mëparshme përfshinin atentatin e dështuar në maj ndaj Giannis Lalas në Lakonia, ku grupi përdorte mjete teknologjike të avancuara për të shmangur regjistrimin nga kamerat dhe përgjuesit.
Hetuesit zbuluan gjithashtu se të arrestuarit kishin arritur të siguronin dokumente të falsifikuara për automjetet, duke treguar lidhje brenda shërbimeve publike greke. Kjo u bë një nga elementet kyçe që çoi në goditjen e organizatës.
Sipas informacioneve të gazetës greke “Protothema”, grupi ishte gati të ekzekutonte një sulm tjetër në Pire, duke zgjedhur si shënjestër një person që ka lidhje me klubet e natës dhe stacionet e benzinës dhe që kishte pasur konflikte të mëparshme me një anëtar të mafies greke.
Lufta e natës mes bandave kriminale, siç raportohet, ka arritur kulmin e saj, me dy kampet kryesore që tashmë janë formuar dhe tensioni që rritet ndërkohë që afron sulmi i radhës.