Në Shkup po përgatitet protesta e thirrur nga shoqatat e dala nga lufta e UÇK-së në Kosovë, e cila do të zhvillohet te Sheshi Skënderbeu. Në prag të këtij tubimi, kryeministri maqedonas Hristijan Mickoski deklaroi se institucionet janë angazhuar maksimalisht për të garantuar sigurinë e pjesëmarrësve dhe për të shmangur çdo incident apo provokim.
Mickoski theksoi qartë se qeveria nuk është organizatore dhe as nuk e mbështet protestën, megjithatë është e gatshme të sigurojë që gjithçka të zhvillohet në mënyrën më të rregullt të mundshme.
“Qeveria nuk e mbështet dhe nuk kemi ndërmend ta mbështesim,” u shpreh ai. “Ne do të kujdesemi që protesta të kalojë në qetësi, të mos ketë incidente dhe të mos ndodhë asgjë që nuk duhet të ndodhë. Nuk ka asnjë marrëveshje politike pas kësaj.”
Ai bëri të ditur gjithashtu se institucionet shtetërore do të ndjekin nga afër lëvizjet dhe aktivitetet për 24 orë para dhe pas tubimit, duke theksuar se edhe partnerët strategjikë janë informuar për masat e ndërmarra. Për këtë qëllim është ngritur një shtab i posaçëm i krizës, që do të koordinojë të gjitha veprimet deri në përfundimin e protestës.