Gjermania ka aktivizuar fazën e parë të sistemit të avancuar të mbrojtjes kundër raketave balistike Arrow 3, një investim rreth 4 miliardë dollarë që synon të forcojë mbrojtjen e Evropës në kushtet e tensioneve të rritura me Rusinë.
Sistemi, i prodhuar në Izrael dhe i zhvilluar me mbështetje amerikane, është pjesë e nismës “Mburoja e Qiellit Evropian”, e krijuar pas pushtimit rus të Ukrainës për të mbushur boshllëqet në mbrojtjen ajrore të vendeve të NATO-s.
Ministri gjerman i Mbrojtjes, Boris Pistorius, deklaroi se Arrow 3 i jep Gjermanisë për herë të parë aftësinë për paralajmërim të hershëm dhe neutralizim të raketave me rreze të gjatë, duke mbrojtur si popullsinë, ashtu edhe infrastrukturën kritike. “Po forcojmë shtyllën evropiane të NATO-s dhe po tregojmë se Gjermania merr përgjegjësi”, theksoi ai.
Një kontratë historike dhe dislokimi i parë jashtë Izraelit
Kontrata e nënshkruar në vitin 2023 konsiderohet marrëveshja më e madhe e eksportit ushtarak në historinë e Izraelit. Sistem Arrow 3 përmban:
radarë të fuqishëm zbulimi,
lëshues raketash,
raketa penguese që godasin objektivat deri në 100 km lartësi, jashtë atmosferës së Tokës.
Pjesët e para të sistemit u dislokuan në bazën ajrore Holzdorf, në një ceremoni ku morën pjesë përfaqësues ushtarakë gjermanë dhe një delegacion izraelit. Ky është instalimi i parë i Arrow 3 jashtë territorit izraelit, të cilin Berlini e cilësoi si një sinjal të fuqishëm të partneritetit me Izraelin.
Elemente të tjera të sistemit pritet të vendosen në zona të ndryshme të Gjermanisë sapo të përfundojë operacionalizimi i plotë.
Pjesë e një mburoje më të gjerë evropiane
Arrow 3 plotëson sistemet ekzistuese gjermane Patriot (rreze e mesme) dhe Iris-T (rreze e shkurtër), duke krijuar një strukturë të integruar mbrojtjeje ajrore.
Nisma European Sky Shield, e udhëhequr nga Gjermania, deri tani është zgjeruar në 23 shtete anëtare, pas propozimit fillestar të Berlinit në gusht 2022.