Autoritetet e Hong Kongut po vijojnë hetimet në shtatë ndërtesat e kompleksit Wang Fuk Court në Tai Po, ku shpërtheu zjarri më vdekjeprurës në 75 vitet e fundit. Numri i të vdekurve ka arritur në 151, ndërsa rreth 40 persona vazhdojnë të jenë të zhdukur.
Drejtori Ekzekutiv i Hong Kongut, Eric Chan, njoftoi se shtatë nga 20 mostrat e rrjetave mbrojtëse të përdorura në skelat e kompleksit nuk përmbushnin standardet e sigurisë nga zjarri. Materialet, të cilat fillimisht u deklaruan të certifikuara, rezultuan të jenë më të lira dhe të pacertifikuara. Chan e quajti këtë praktikë një “akt të turpshëm”, duke shtuar: “Ata ishin të interesuar vetëm të fitonin para në kurriz të njerëzve.”
Derisa hetimet për shkelje të sigurisë vazhdojnë, Byroja Kundër Korrupsionit ka arrestuar 13 persona, përfshirë drejtorë dhe një inxhinier konsulent të një kompanie ndërtimi. Gjithashtu, ka nisur një hetim gjithëpërfshirës për rastin e vrasjes pa dashje.
Banorët dhe qytetarët kërkojnë llogaridhënie nga zyrtarët përgjegjës, ndërsa dy individë janë arrestuar nga policia e sigurisë kombëtare, përfshirë një student, Miles Kwan, i cili u ndalua në lidhje me një peticion online që kërkonte mbështetje për viktimat dhe ndëshkimin e fajtorëve.