Vatikani publikoi sot një deklaratë doktrinare që mbron monogaminë në martesë, duke e përshkruar si “një bashkim ekskluziv dhe përkatësi të ndërsjellë”, nën titullin “Una Caro – Në Lavdi të Monogamisë”.
Dokumenti prej 40 faqesh, i nxjerrë nga Dikasteri për Doktrinën e Besimit dhe i mbështetur nga Papa Leone XIV, hedh poshtë poliamorinë dhe rikonfirmon se çdo martesë autentike përbëhet nga dy individë, të cilët duhet të krijojnë një marrëdhënie intime dhe gjithëpërfshirëse, e cila nuk mund të ndahet me të tjerët.
“Ekskluziviteti është karakteristika kryesore e martesës. Vetëm dy njerëz mund t’i japin njëri-tjetrit përkushtim të plotë; çdo përjashtim e bën marrëdhënien të pjesshme dhe të pamjaftueshme për të respektuar dinjitetin e tjetrit,” thuhet në dokument.
Deklarata vjen pas kërkesave nga peshkopët në Afrikë, ku poligamia praktikohet ende, dhe për shkak të rritjes së formave jo-monogame të bashkimeve, të quajtura ndonjëherë poliamori, në Perëndim.
Dokumenti nënvizon se martesa duhet të kuptohet si bashkim unik dhe ekskluziv midis një burri dhe një gruaje, duke ripohuar rolin themelor të monogamisë në jetën bashkëshortore dhe shoqërinë katolike.