Në një kohë që është rihapur çështja e 21 janarit dhe momente të asaj dite janë rikthyer në fokus, një prej dëshmitarëve okularë ka folur për Radar.al duke rrëfyer në vetë të parë përjetimet e atyre orëve të vështira. Operatori i News24 Ervin Daja e përshkruan 21 janarin 2011 si një nga ditët që s’do ta harrojë kurrë dhe pikërisht momennti i vrasjeve.
Pamjet e fiksuara nga kamera e tij e vendosur në një pozicion tepër të volitshëm u përdorën më pas dhe si provë nga prokuroria për vrasjet e asaj dite.
“Ata që nuk ishin në terren atë ditë e kanë të vështirë ta kuptojnë çfarë ndodhi. Ishte një nga ditët që nuk do ta harroj kurrë. Kemi dalë në punë në orën 09:00 të mëngjesit dhe u nisëm për në bulevard. Tensioni ndihej në ajër sepse shumë deklarata ishin bërë gjatë javës. Berisha kishte thënë që nuk do t’i lejonte të hynin brenda. Deklaratat të linin të kuptonin që s’do ishte ditë e lehtë. Kur shkova në bulevard po shihja vendin për të zgjedhur këndin e duhur. Zgjodha vendin te Kullat Binjake, te ballkoni që të mos më humbte asgjë. Momenti që s’do ta harroj asnjëherë ka qenë momenti i vrasjeve. Kamera ime aty për të filmuar gjithçka. Po filmonte vrasjen. Kishte shumë persona që filmonin, por e veçanta e planit tim ishin se në pamje ishin vrasësit dhe protestuesit. Për këtë arsye u përdorën si provë materiale”, rrëfeu Daja.