Prokuroria e Posaçme ka përfunduar hetimet dhe ka dërguar për gjykim dosjen nr. 44/2025, që përfshin dy inspektorë të Inspektoratit Shtetëror Teknik Industrial (ISHTI) dhe një administrator biznesi, të akuzuar për korrupsion aktiv dhe pasiv.
Sipas SPAK, përpara Gjykatës së Posaçme do të dalin:
Julian Suljoti, administrator i “Ansoil sh.a.” në Korçë – i akuzuar për korrupsion aktiv ndaj personave që ushtrojnë funksione publike;
Olsi Jarazi, inspektor i ISHTI – i akuzuar për korrupsion pasiv;
Luan Sadikaj, ish-inspektor i ISHTI – i akuzuar për korrupsion pasiv.
Sipas hetimeve proaktive të BKH-së, të shoqëruara me metoda speciale, rezultoi se më 1 nëntor 2021 dy inspektorët Jarazi dhe Sadikaj kanë marrë 900 mijë lekë dhe 10 mijë dollarë nga administratori Julian Suljoti. Pagesa, sipas SPAK, është bërë për të shmangur masat administrative ndaj biznesit të tij, i cili tregtonte vajra lubrifikantë pa dokumentacionin e nevojshëm teknik dhe pa licencë përkatëse.
Dosja nisi fillimisht në Prokurorinë e Korçës në vitin 2023 dhe më pas kaloi për kompetencë në SPAK, pasi veprat penale lidhen me korrupsionin aktiv dhe pasiv të personave që ushtrojnë funksione publike, të kryera në bashkëpunim.