Komisionerja për Zgjerimin, Marta Kos, gjatë konferencës ku u hap grupkapitulli i fundit i negociatave mes Shqipërisë dhe Bashkimit Europian, e cilësoi këtë moment si një arritje të rëndësishme për vendin.
Në fjalën e saj, Kos vlerësoi progresin e Shqipërisë dhe ndikimin transformues të reformave. Sipas saj, Shqipëria po shndërrohet në një shembull pozitiv për rajonin.
“Dita e sotme tregon se Bashkimi Europian mund të mbështetet tek Shqipëria në të ardhmen,” u shpreh ajo, duke falënderuar presidencën daneze për rolin e saj në këtë etapë të re të negociatave.
Komisionerja theksoi se ndryshimet e ndërmarra në kuadër të reformave po e afrojnë Shqipërinë me standardet europiane. “Shqipëria është ilustrimi më i qartë i fuqisë transformuese të reformave. Jeni një frymëzim për Ballkanin,” tha Kos.
Ajo vuri në dukje se hapja e të gjithë grupkapitujve është një sukses i rëndësishëm, por mbyllja e tyre përbën sfidën thelbësore që duhet përballuar.
Sipas Kos, faza e ardhshme do të kërkojë përmbushjen e piketave nga Shqipëria, ndërsa nënvizoi se vendi gëzon mbështetje të gjerë nga shtetet kandidate. Ajo i bëri thirrje institucioneve që të vijojnë punën në bashkëpunim me opozitën dhe shoqërinë civile për të çuar procesin përpara.