Startapi amerikan i inteligjencës artificiale Anthropic ka zbuluar një sulm kibernetik të kryer kryesisht në mënyrë autonome nga një inteligjencë artificiale, duke e konsideruar këtë fushatën e parë të regjistruar të spiunazhit kibernetik të automatizuar nga IA.
Sulmi i atribuohet grupit GTG-1002, i mbështetur nga shteti kinez, i cili përdori robotin “Cloud” të Anthropic për të spiunuar dhe vjedhur të dhëna nga rreth 30 objektiva, përfshirë kompani të mëdha teknologjike, institucione financiare dhe agjenci qeveritare në shumë vende. Sipas raportit të kompanisë, shumica e sulmeve u kryen në mënyrë autonome përmes softuerit “Claude Code”, me një shpejtësi që nuk mund të arrihej nga njerëzit.
Ky incident shënon një ndryshim themelor në mënyrën se si kriminelët kibernetikë përdorin inteligjencën artificiale, duke manipuluar robotin Claude për të kryer sulme me mbikëqyrje minimale njerëzore. Për herë të parë, një model IA është lejuar të veprojë në mënyrë të pavarur, duke anashkaluar mekanizmat e sigurisë dhe duke u paraqitur si profesionistë të sigurisë kibernetike.
Fushata zgjati disa ditë deri sa u zbulua nga sistemet e kompanisë, e cila më pas pezulloi llogaritë e përfshira, njoftoi autoritetet dhe implementoi mjete të përmirësuara për zbulimin dhe parandalimin e sulmeve të ardhshme.