Prokuroria e Fierit ka përfunduar hetimet dhe ka dërguar për gjykim një shtetas me inicialet B.Sh., i akuzuar për dhunë në familje dhe keqtrajtim të të miturit.
Ngjarja e rëndë ka ndodhur më 12 qershor 2023, kur burri dyshohet se ka ushtruar dhunë fizike ndaj djalit të tij të mitur, si dhe ka kërcënuar bashkëshorten duke i thënë se “nuk do ta shihte më fëmijën”.
Sipas hetimeve, E.M., bashkëshortja e të pandehurit, ka denoncuar në polici se gjatë martesës është përballur me dhunë të vazhdueshme psikologjike dhe fizike, e cila ishte përshkallëzuar muajt e fundit, duke e detyruar të largohej nga banesa bashkë me djalin.
Pas kallëzimit, Prokuroria regjistroi procedimin penal nr. 839/2025 dhe arrestoi B.Sh., ndaj të cilit u caktua masë sigurie, ndërsa për të miturin u lëshua urdhër i menjëhershëm mbrojtjeje.
Në përfundim të hetimeve, Prokuroria konfirmon se provat tregojnë qartë konsumimin e veprave penale “Dhuna në familje” (neni 130/a/4) dhe “Keqtrajtimi i të miturit” (neni 124/b/1) të Kodit Penal.