Një tjetër skenë horror ka tronditur Meksikën: autoritetet kanë gjetur 48 qese me pjesë trupash njerëzish në një zonë të kontrolluar nga kartelet e drogës pranë qytetit Guadalajara.
Zyra e prokurorisë konfirmoi se hetimet vijojnë, ndërsa ende nuk dihet numri i saktë i viktimave.
“Duhet të kryejmë analizat mjeko-ligjore për të përcaktuar se sa trupa përmbajnë qeset”, tha prokurorja e shtetit, Blanca Trujillo.
Varri sekret u zbulua katër javë më parë nga një grup vullnetarësh që kërkojnë të zhdukurit, i njohur si Guerreros Buscadores (“Kërkuesit Luftues”). Autoritetet po punojnë me ta për rikuperimin dhe identifikimin e mbetjeve.
Zbulimi i fundit shtohet në listën e gjatë të rasteve të ngjashme në shtetin Jalisco — një zonë e shkatërruar prej vitesh nga Karteli i Gjeneratës së Re të Jaliscos (CJNG), i cilësuar si “organizatë terroriste e huaj” nga administrata amerikane.
Meksika numëron mbi 127 mijë persona të zhdukur që nga viti 2006, kur nisi “lufta kundër drogës”, një strategji që kritikët e quajnë dështim tragjik. Vetëm në Jalisco, janë raportuar më shumë se 15,900 persona të zhdukur.