Shqipëria pritet të ketë ligjin e parë për kriptovalutat dhe asetet digjitale brenda vitit 2025, duke hapur rrugën për krijimin e një kuadri të qartë ligjor për këtë treg në zhvillim.
Gjatë raportimit vjetor në Komisionin për Ekonominë, Punësimin dhe Financat, drejtoresha e përgjithshme e Autoritetit të Mbikëqyrjes Financiare (AMF), Mimoza Kaçi, bëri të ditur se drafti i parë i ligjit është përgatitur dhe aktualisht ndodhet në proces konsultimi me grupet e interesit.
“Kemi punuar për draftimin e ligjit dhe kemi dërguar versionin e parë për konsultim. Parashikojmë që drafti i plotë të finalizohet brenda këtij viti,” – tha Kaçi.
Ajo shtoi se gjatë vitit 2024 është realizuar një vlerësim krahasues mes kuadrit shqiptar dhe atij të Bashkimit Evropian, ku rregullorja e re për kriptovalutat (MiCA) ka hyrë në fuqi plotësisht këtë vit.
“Procesi në BE nisi me implementim gradual, ndërsa tashmë zbatohet plotësisht. Edhe ne po ndjekim të njëjtën qasje për ta përshtatur me realitetin vendas,” – sqaroi Kaçi.
Në hartimin e ligjit janë të përfshira edhe Banka e Shqipërisë, Ministria e Financave dhe Ministria e Ekonomisë dhe Inovacionit, me synim ndërtimin e një kuadri që garanton transparencë, siguri dhe mbrojtje të investitorëve.
Sipas vlerësimeve të ekspertëve, në Shqipëri më shumë se 80 mijë qytetarë zotërojnë portofolë digjitalë, ndërsa gjatë vitit 2024, SPAK raportoi sekuestrimin e kriptovalutave me vlerë 11 milionë euro.