Presidenti i Republikës, Bajram Begaj, priti sot në një takim Komandantin e misionit të NATO-s në Kosovë, KFOR, Gjeneralmajor Özkan Ulutaş.
Gjatë takimit, Presidenti Begaj vlerësoi marrjen e drejtimit të KFOR-it nga Turqia për herë të dytë dhe shprehu mirënjohjen për kontributin e saj me trupa në Kosovë. Ai theksoi rëndësinë e KFOR-it për paqen dhe stabilitetin, jo vetëm në Kosovë, por edhe në rajon, duke rikofirmuar mbështetjen e Shqipërisë për thellimin e bashkëpunimit rajonal si faktor kyç për sigurinë.
Presidenti Begaj inkurajoi gjithashtu bashkëpunimin mes KFOR-it dhe institucioneve të Kosovës, veçanërisht me Forcën e Sigurisë së Kosovës, për zhvillimin, modernizimin dhe transformimin e saj në përputhje me standardet e NATO-s.
Gjatë takimit u vlerësua angazhimi i KFOR-it për garantimin e sigurisë dhe lirisë së lëvizjes, sidomos në veri të Kosovës, ndërsa Kreu i Shtetit rikonfirmoi mbështetjen e plotë të Shqipërisë për misionin KFOR.