Një ngjarje tragjike ka tronditur komunitetin shqiptar në Itali. Hekuran Cumani, 23 vjeç, me origjinë shqiptare, ka humbur jetën pas një konflikti fizik të ndodhur në orët e para të mëngjesit të 18 tetorit, jashtë ambienteve të një klubi nate në qytetin Perugia.
Sipas mediave italiane, i riu u godit me thikë gjatë një përleshjeje që ndodhi rreth orës 04:30 në parkingun e lokalit, në Via Luigi Vanvitelli. Goditjet fatale ishin në zonën e fytit dhe të gjoksit. Autoritetet italiane e gjetën trupin e tij të shtrirë në asfalt, ndërsa hetimet për rrethanat e ngjarjes dhe autorin e dyshuar – një person me origjinë nga Afrika e Veriut – janë ende në vijim.
Hekurani kishte vite që jetonte në Itali dhe zotëronte shtetësi italiane. Ai banonte në Fabriano të Ankonës dhe punonte gjatë sezonit turistik në një restorant familjar në Senigallia, ndërsa gjatë dimrit merrej me punë të rastësishme.
Mediat italiane e përshkruajnë të ndjerin si një djalë të qetë, të dashur dhe pa konflikte. “Ai ishte i qetë dhe kishte një zemër të artë. Nuk kërkonte telashe dhe gjithmonë shihte punët e veta,” – ka rrëfyer një kushëri i tij për mediat lokale.
I apasionuar pas palestrës dhe sporteve, Hekurani njihej për karakterin e tij të qetë dhe pozitiv. Vdekja e tij ka shkaktuar tronditje te familjarët, miqtë dhe komuniteti shqiptar në Itali.