SHBA– Presidenti Trump e konsideron dërgimin e raketave Tomahawk në Ukrainë si veprim të parakohshëm që mund shkaktojë përshkallëzim të situatës.
Presidenti i SHBA-së, Donald Trump, mendon se është herët për të dërguar raketa Tomahawk në Ukrainë, gjë për të cilën shpreson presidenti ukrainas Zelenski. “Shpresoj të mos kemi nevojë për to”, tha Trump në Shtëpinë e Bardhë gjatë takimit me Presidentin ukrainas Volodymyr Zelenski. “Shpresojmë që do të jemi në gjendje ta përfundojmë luftën pa diskutuar për Tomahawk-ët”.
Dronë në këmbim të raketave Tomahawk
Në konferncën për shtyp para takimit në Shtëpinë e Bardhë, Zelensky tha në prani të gazetarëve se Ukraina mund ta furnizojë SHBA-në me dronë në këmbim të raketave Tomahawk. Por Trump tha se dërgimi i “Tomahawkëve” mund të çojë në një përshkallëzim. Këto armë janë të shkëlqyera, por shumë të rrezikshme.
Qeveria ukrainase kishte njoftuar para takimit se Kievi shpreson që dërgimi i raketave Tomahawk dhe i armëve të tjera amerikane, do të jenë tema më të rëndësishme e takimit midis Trump dhe Zelenskit. Por pas një telefonate me udhëheqësin e Kremlinit, Vladimir Putin, Trump deklaroi se SHBA kanë vetë nevojë për këto sisteme armësh.
Takimi në Budapest vetëm me Putinin
Presidenti amerikan njoftoi gjithashtu se së shpejti ka të ngjarë të zhvillojë njëtakim kokë më kokë me Putinin në Hungari, por pa përfshirjen e drejtpërdrejtë të Ukrainës. Megjithatë Trumpi theksoi njëkohësisht se do ta mbajë kontaktin me Zelenskin. Presidenti amerikan tha se marrëdhëniet midis Putinit dhe Zelenskit janë të helmuara dhe se ka “shumë armiqësi” midis Moskës dhe Kievit. Sipas tij duhet që urrejtja të zhduket.
Trump shtoi se do t’i bëjë gjërat të këndshme për të gjithë. Të tri palët – Rusia, Ukraina dhe Shtetet e Bashkuara – do të përfshihen në një mënyrë ose në një tjetër në bisedime, por kjo mund të bëhet veçmas, tha ai.
Trumpi dhe Putini u takuan në gusht në Alaskë pa Zelenskin dhe pa ndonjë rezultat të prekshëm./DW