Një histori e jashtëzakonshme ka tronditur Austrinë jugore, ku një ngatërresë mes dy foshnjave të porsalindura në një spital të qytetit Graz është zbuluar vetëm 35 vite më vonë, falë një testi ADN-je.
Sipas televizionit ORF, dy gratë, të lindura në tetor të vitit 1990, u takuan së fundmi me njëra-tjetrën dhe me prindërit e tyre biologjikë, pasi doli në dritë se ishin ndërruar aksidentalisht në ditën e lindjes.
Gazeta “Kronen Zeitung” raporton se të dyja kishin lindur para kohe dhe ishin mbajtur në inkubatorë, përpara se të bashkoheshin gabimisht me nënat e gabuara. Spitali konfirmoi ngatërresën dhe kërkoi ndjesë publike:
“Na vjen shumë keq që ky gabim ndodhi në atë kohë,” – deklaroi drejtori i spitalit.
Njëra prej grave e kishte mësuar vite më parë se nuk ishte fëmija biologjik i prindërve që e rritën, pasi gjatë një dhurimi gjaku u zbulua se grupi i saj i gjakut ishte i papajtueshëm. Megjithë hetimet e spitalit dhe një apel publik në vitin 2016, familja tjetër nuk ishte gjetur.
Ndërkohë, gruaja e dytë e zbuloi të vërtetën vetëm pak javë më parë, pasi gjatë shtatzënisë mësoi grupin e saj të gjakut dhe e lidhi rastin me historinë e pazgjidhur të shkëmbimit të foshnjave. Ajo kontaktoi gruan tjetër dhe një test ADN-je konfirmoi lidhjen e tyre biologjike.
“Sikur të kisha pasur një motër për 35 vjet,” – tha njëra prej tyre, duke e përshkruar përvojën si të çuditshme, por të bukur. Ndërsa tjetra, që e kishte ditur më herët, u shpreh se ribashkimi ishte “një ndjenjë e papërshkrueshme”.