Jennifer Aniston ka zbuluar për herë të parë një betejë të gjatë e të dhimbshme që mbajti të fshehtë për gati dy dekada: përpjekjet e saj për të pasur një fëmijë. Në një intervistë për Harper’s Bazaar UK, aktorja 56-vjeçare hodhi poshtë mitet që e kanë ndjekur për vite, se nuk donte të bëhej nënë sepse ishte “egoiste” dhe e përqendruar në karrierë.
“Ata nuk e dinin çfarë po kaloja, as luftën time për 20 vjet për të krijuar një familje. I mbaja për vete problemet e mia shëndetësore,” rrëfeu ajo, duke shtuar se thashethemet për mungesë dëshire për fëmijë e kanë lënduar thellë.
Ylli i “Friends” tha se me kalimin e viteve ka mësuar të mos reagojë ndaj lajmeve të pavërteta: “Familja ime e di të vërtetën. Miqtë e mi e dinë të vërtetën. Kaq mjafton.”
Aniston, e martuar dikur me Brad Pitt, ka treguar edhe më parë për përpjekjet e dështuara me fertilizim in vitro (IVF) dhe dëshirën për t’i ngrirë vezët e saj në moshë më të re. “Ishte një rrugë e vështirë, por më bëri ajo që jam sot,” tha ajo.
Aktorja foli gjithashtu për ndikimin që ka pasur divorci i prindërve të saj kur ajo ishte vetëm 9 vjeç. “Isha një gur shahu mes tyre. Ishte e dhimbshme, por në shtëpi kishte edhe shumë humor, shumë të qeshura,” kujton ajo.
Karriera e Aniston ndryshoi përgjithmonë me rolin e Rachel Green në “Friends”. Duke kujtuar kolegun dhe mikun e saj të ndjerë Matthew Perry, ajo tha me emocion: “Më thyen zemrën që kishte kaq shumë demonë, por gjithsesi arriti të qeshte shumë. Pa të, ‘Friends’ nuk do të kishte qenë i njëjti.”
Sot, Jennifer Aniston ndien paqe me veten dhe gëzohet që brezat e rinj vazhdojnë ta duan serialin legjendar. “Shumë më thonë se e shikojnë ‘Friends’ për t’u qetësuar nga ankthi. Ky është komplimenti më i bukur që mund të marr.”