Nga sot, Shqipëria bëhet pjesë e zonës unike të pagesave në euro, SEPA, duke sjellë përfitime të mëdha për qytetarët dhe bizneset. Të gjitha transfertat për jashtë vendit, si dhe paratë që mbërrijnë në vend përmes kanaleve zyrtare, do të jenë më të shpejta dhe me kosto shumë më të ulëta.
Në konferencën e lancimit të transaksionit të parë të Shqipërisë në SEPA, guvernatori i BSH, Gent Sejko, theksoi se integrimi në SEPA sjell përfitime shoqërore dhe rajonale: ulje të informalitetit, rritje të përfshirjes financiare dhe harmonizim me tregun evropian.
“Sipas vlerësimeve të Bankës Botërore, një rritje prej 10% e pagesave digjitale ul informalitetin me 2%. Emigrantët dhe familjet e tyre mund të kursejnë dhjetëra miliona euro në vit përmes dërgesave bankare nëpërmjet SEPA-s. Ndërkohë, bizneset në Ballkanin Perëndimor deri sot kanë paguar deri 10 herë më shumë për transfertat rajonale, ndërsa me SEPA kjo kosto bie në nivele evropiane”, tha Sejko.
Ambasadori i BE në Shqipëri, Silvio Gonzato, e përshkroi hapin si mbajtje të premtimeve të BE dhe kërkoi thellimin e reformave në procesin e anëtarësimit.
“Çdo qytetar ndjehet i barabartë me ata të BE-së, me transaksione më të shpejta dhe më pak kosto. Kjo tregon se angazhimet politike të vendosura sjellin rezultate konkrete për qytetarët”, tha Gonzato.
Kryeministri Edi Rama e konsideroi përfshirjen në SEPA si një hap të rëndësishëm drejt Bashkimit Evropian.
Nga sot, komisionet për transfertat elektronike do të jenë:
Zero komision për transaksione deri në 40 mijë lekë
0.005% për transaksione deri në 10 milionë lekë
10 euro për transfertat mbi 10 milionë lekë
Maksimumi i komisionit nuk do të jetë më shumë se 25 euro, një ulje gati 10 herë krahasuar me më parë
Ky hap historik pritet të lehtësojë tregtinë, remitancat dhe pagesat digjitale, duke sjellë përfitime të prekshme për qytetarët dhe ekonominë shqiptare.