Kolegji Penal i Gjykatës së Lartë ka vendosur të lërë në fuqi vendimin e Gjykatës së Posaçme të Apelit për Korrupsionin dhe Krimin e Organizuar, duke rrëzuar rekursin e Prokurorisë së Posaçme për rikthimin e masës së sigurimit ndaj gazetarit Elton Qyno.
Prokuroria kërkonte rikthimin e masës “detyrimi për t’u paraqitur” për Qyno-n, por Apeli dhe më pas Gjykata e Lartë vlerësuan se artikujt e publikuar nga gazetari nuk shkelin detyrimet profesionale dhe i shërbejnë interesit publik. Sipas gjykatës, provat nuk justifikojnë vendosjen e një mase sigurimi personal.
Vendimi thekson se nuk ka prova që Qyno të ketë ndërhyrë në lajmet e publikuara, të ketë shpërndarë informacione të rreme apo përfitime të paligjshme, duke mbrojtur kështu lirinë e shprehjes dhe lirinë e shtypit, të garantuara nga Kushtetuta dhe praktika e Gjykatës Europiane për të Drejtat e Njeriut.