Njohja e shtetësisë palestineze nga Britania e Madhe, Kanadaja dhe Australia është cilësuar si një moment historik nga autoritetet palestineze dhe drejtuesit e Hamasit.
Mahmoud Mardawi, një zyrtar i lartë i Hamasit, e përshëndeti vendimin duke e konsideruar një “fitore për të drejtat palestineze dhe drejtësinë e kauzës”, si dhe një dëshmi e forcës dhe legjitimitetit të kërkesës për një shtet të pavarur.
“Kjo njohje dërgon një mesazh të qartë se, pavarësisht pushtimit dhe krimeve të kryera gjatë tij, të drejtat kombëtare të palestinezëve nuk mund të fshihen,” tha Mardawi. Ai shtoi se ky hap është një fitore morale dhe politike, që i afrohet aspiratës për një shtet të pavarur palestinez me të drejta të njohura ndërkombëtarisht.
Britania, Kanadaja dhe Australia, të njohura si aleate të ngushta të Izraelit, kanë bërë kështu një ndryshim të dukshëm në qëndrimin e tyre ndaj konfliktit izraelito-palestinez, duke shtuar peshë ndërkombëtare në kërkesën për njohjen e shtetit të Palestinës.